വലില്ലാഹില്‍ ഹംദ്…
വിശ്വാസികളുടെ രണ്ട് ആഘോഷങ്ങളിലൊന്നാണ് ഈദുല്‍ അദ്ഹാ. ഒരു പ്രസ്ഥാനമെന്ന് വിശേഷിപ്പിക്കപ്പെട്ട ഇബ്‌റാഹിം നബി(അ)യുടെ അനുസരണത്തിന്റെയും ഭക്തിയുടെയും ത്യാഗത്തിന്റെയും അഗാധമായ സ്മരണകളാണ് ബലിപെരുന്നാളിന്റെ പ്രത്യേകത. ആത്മീയവും മാനുഷികവുമായ അര്‍ഥത്തില്‍ ത്യാഗത്തിന്റെ മനോഹരമായ ഓര്‍മപ്പെടുത്തലാണ് ഈദുല്‍ അദ്ഹ. ലോകമെമ്പാടുമുള്ള മുസ്ലിംകള്‍ പ്രിയപ്പെട്ടവരോടൊപ്പം ആഘോഷവും പ്രാര്‍ഥനകളുമായി സജീവമാകുന്ന സമയമാണിത്. രണ്ട് പെരുന്നാളുകളും കേവലം ആഘോഷങ്ങളല്ല, മറിച്ച് ആരാധനാബന്ധിതം കൂടിയാണ്.
ബലിപെരുന്നാളിന്റെ സാരം ആഴത്തില്‍ വേരൂന്നിയിരിക്കുന്നത് അതിന്റെ പ്രതീകാത്മകതയിലാണ്. പ്രിയപ്പെട്ട പുത്രനായ ഇസ്മാഈലിനെ ബലിയര്‍പ്പിക്കാ ന്‍ അല്ലാഹു കല്‍പിച്ച സന്ദര്‍ഭം. ഇബ്‌റാഹിം പ്രവാചകന്‍ നേരിട്ട ഈ പരീക്ഷണത്തെയാണ് ഓരോ ബലിപെരുന്നാളും ഓര്‍മിപ്പിക്കുന്നത്. ഈ ദൈവിക പരീക്ഷണം ഇബ്‌റാഹിം നബിയുടെ അചഞ്ചലമായ വിശ്വാസത്തെയും അല്ലാഹുവിന്റെ ഹിതത്തോടുള്ള വിധേയത്വത്തെയും കാണിച്ചുതരുന്നു. മാത്രമല്ല, സര്‍വശക്തനോടുള്ള തന്റെ ഭക്തി എല്ലാറ്റിനുമുപരിയായി സ്ഥാപിക്കേണ്ടതിന്റെ പ്രാധാന്യം കൂടി എടുത്തുകാണിക്കുന്നു.
ഈ ചരിത്രസ്മരണയോടൊപ്പം തന്നെ, ബലിപെരുന്നാളിന്റെ ഭാഗമായി നിര്‍വഹിക്കുന്ന ബലികര്‍മം ഇസ്ലാമിന്റെ കേന്ദ്ര ആശയങ്ങളായ നിസ്വാര്‍ഥതയുടെയും മറ്റുള്ളവരോടുള്ള സഹാനുഭൂതിയുടെയും ആത്മാവിനെ കൂടി ഉള്‍ക്കൊള്ളുന്നു. ത്യാഗത്തിന്റെ യഥാര്‍ഥ സത്ത ഭൗതികമായ വഴിപാടിലല്ല, മറിച്ച് അത് അനുഷ്ഠിക്കുന്ന ആത്മാര്‍ഥതയിലും നീതിയിലുമാണ് എന്ന് ഖുര്‍ആന്‍ സൂചിപ്പിക്കുന്നു.
നമ്മുടെ സ്വന്തം അനുഗ്രഹങ്ങളെക്കുറിച്ച് ചിന്തിക്കാനും പ്രയാസങ്ങള്‍ അനുഭവിക്കുന്ന മറ്റുള്ളവരെക്കുറിച്ച് ആലോചിക്കാനുമുള്ള അവസരമായി പെരുന്നാളുകള്‍ മാറണം. ആവശ്യക്കാര്‍ക്ക് ബലിമാംസം എത്തിച്ചുനല്‍കിയും ജീവകാരുണ്യ പ്രവര്‍ത്തനങ്ങളി ല്‍ പങ്കാളികളായും ദരിദ്രര്‍ക്കു ദാനം ചെയ്തും നമ്മുടെ ഹൃദയത്തിനുള്ളില്‍ കിടക്കുന്ന അനുകമ്പ, നീതി, ഐക്യദാര്‍ഢ്യം തുടങ്ങിയ മൂല്യങ്ങള്‍ പ്രയോഗവത്കരിക്കാന്‍ സാധിക്കണം.
മാത്രമല്ല, ഈദുല്‍ അദ്ഹ മുസ്ലിംകള്‍ക്കും വിശാലമായ സമൂഹത്തിനും ഇടയില്‍ ഐക്യവും സാഹോദര്യവും ശക്തിപ്പെടുത്താനുള്ള അവസരമായി വിനിയോഗിക്കണം. കുടുംബങ്ങളും സുഹൃത്തുക്കളും ഒരുമിച്ച് പെരുന്നാള്‍ ആഘോഷിക്കുകയും, കുടുംബ ബന്ധങ്ങള്‍ പുതുക്കുകയും സമുദായാന്തര ബന്ധങ്ങള്‍ ഊട്ടിയുറപ്പിക്കുകയും വേണം. പെരുന്നാളുകള്‍ സാമൂഹിക ഐക്യത്തിന്റെ വിളംബരമായി മാറണം. ഈദിന്റെ ആഹ്ലാദകരമായ അന്തരീക്ഷം ഇസ്ലാമിക വിശ്വാസത്തിന്റെ സാര്‍വത്രികത ഉയര്‍ത്തിക്കാട്ടുകയും ഐക്യബോധം വളര്‍ത്തുകയും ചെയ്യുന്നുണ്ട്. പെരുന്നാള്‍ ദിനങ്ങളില്‍ മുഴങ്ങിക്കേള്‍ക്കുന്ന തക്ബീര്‍ ധ്വനികളെ അന്വര്‍ഥമാക്കുംവിധം അനുഗ്രഹങ്ങള്‍ക്ക് നന്ദികാണിക്കാന്‍ നമുക്ക് സാധിക്കണം.
ഭിന്നിപ്പും വിയോജിപ്പും പലപ്പോഴും നിലനില്‍ക്കുന്ന ഇന്നത്തെ ലോകത്ത്, ഈദുല്‍ അദ്ഹയുടെ ഐക്യ സന്ദേശത്തിന് വലിയ പ്രാധാന്യമുണ്ട്. മനുഷ്യത്വത്തെക്കുറിച്ചും മറ്റുള്ളവരുടെ കഷ്ടപ്പാടുകള്‍ ലഘൂകരിക്കുന്നതിന് കൂട്ടായി പ്രവര്‍ത്തിക്കേണ്ടതിന്റെ പ്രാധാന്യത്തെക്കുറിച്ചും ഇത് നമ്മെ ഓര്‍മിപ്പിക്കുന്നു. ത്യാഗത്തിന്റെ ചൈതന്യം ഉള്‍ക്കൊള്ളുന്നതിലൂടെയും സഹജീവികളോട് ദയ കാണിക്കുന്നതിലൂടെയും, കൂടുതല്‍ അനുകമ്പയും യോജിപ്പും ഉള്ള ഒരു സമൂഹത്തെ വാര്‍ത്തെടുക്കാന്‍ നമുക്ക് സാധിക്കും. ഇതര മതവിശ്വാസികളായ സുഹൃത്തുക്കള്‍ക്കും അയല്‍വാസികള്‍ക്കും പെരുന്നാളിന്റെ സന്തോഷം പകരാന്‍ നമുക്ക് സാധിക്കണം. വീടുകളില്‍ സന്ദര്‍ശനം നടത്തണം. നമ്മുടെ സന്തോഷങ്ങളിലേക്ക് അവരെ ക്ഷണിക്കണം. സൗഹൃദവും സ്‌നേഹവും കൂടുതല്‍ ശക്തിയാര്‍ജിക്കേണ്ട സാമൂഹിക സാഹചര്യത്തില്‍ പെരുന്നാളുകള്‍ അതിനുള്ള അവസരമായി മാറണം. പ്രതീകാത്മകമായ കാട്ടിക്കൂട്ടലുകളോ ഫോട്ടോഷൂട്ടുകളോ അല്ല വേണ്ടത്. സ്വാഭാവികമായ ഐക്യപ്പെടലും പങ്കുവെപ്പുകളുമാണ് ഉണ്ടാവേണ്ടത്.
ഇബ്‌റാഹിം നബിയുടെ ഭക്തി, ത്യാഗം, നിസ്വാര്‍ഥത എന്നിവയില്‍ നിന്ന് പാഠമുള്‍ക്കൊള്ളാന്‍ നമുക്ക് ശ്രമിക്കാം. നമ്മുടെ ത്യാഗപ്രവൃത്തികള്‍ വിശ്വാസത്തിന്റെ സാക്ഷ്യവും സര്‍വശക്തനോടുള്ള നന്ദിയുടെ പ്രകടനവുമാകട്ടെ. അനുകമ്പയും നീതിയും ഐക്യവും വാഴുന്ന സമൂഹത്തെ സൃഷ്ടിക്കാന്‍ ബലിപെരുന്നാളിന്റെ ചൈതന്യം നമ്മെ പ്രചോദിപ്പിക്കട്ടെ. എല്ലാവര്‍ക്കും പെരുന്നാള്‍ ആശംസകള്‍.