24 Wednesday
July 2024
2024 July 24
1446 Mouharrem 17

റമദാനും ദുര്‍ബല ഹദീസുകളും

പി കെ മൊയ്തീന്‍ സുല്ലമി


റമദാനോടും തറാവീഹ് നമസ്‌കാരത്തോടും ബന്ധപ്പെട്ട് ദുര്‍ബല ഹദീസുകളുടെ അടിസ്ഥാനത്തില്‍ പല അനാചാരങ്ങളും നാട്ടില്‍ നടന്നുവരുന്നുണ്ട്. ചില ദുര്‍ബല ഹദീസുകള്‍ ശ്രദ്ധിക്കുക: ”നബി(സ) അരുളിയതായി അനസ്(റ) പ്രസ്താവിച്ചു: നബി(സ) റജബ് മാസത്തിലേക്ക് പ്രവേശിച്ചാല്‍ ഇപ്രകാരം പറയുമായിരുന്നു: അല്ലാഹുവേ, ഞങ്ങള്‍ക്കു റജബിലും ശഅ്ബാനിലും ബര്‍കത്ത് നല്‍കേണമേ. റമദാനിനെ ഞങ്ങളില്‍ എത്തിക്കുകയും ചെയ്യേണമേ” (ത്വബ്‌റാനി).
ഇമാം ദഹബി മേല്‍ ഹദീസിനെ കുറിച്ച് രേഖപ്പെടുത്തുന്നു: ”ഈ ഹദീസിന്റെ പരമ്പരയില്‍ സാഇദതുബ്‌നു അബീദിവാദ്, സിയാദുന്നമീരി എന്നീ രണ്ടു വിശ്വസ്തരല്ലാത്ത വ്യക്തികളുണ്ട്” (മീസാനുല്‍ ഇഅ്തിദാല്‍ 2:65). പ്രസ്തുത ഹദീസ് ദുര്‍ബലമാണെന്ന് ഇബ്‌നു ഹജറുല്‍ അസ്ഖലാനി തബ്‌യീനുല്‍ അജബി ബിമാ വറദഫീ ഫള്‌ലി റജബിന്‍ എന്ന ഗ്രന്ഥത്തില്‍ രേഖപ്പെടുത്തിയിട്ടുണ്ട്. (പേജ് 19)
നബി(സ)യില്‍ നിന്നു സല്‍മാനുല്‍ ഫാരിസി വഴിയായി റിപ്പോര്‍ട്ട് ചെയ്യപ്പെട്ട മറ്റൊരു ഹദീസ് ഇപ്രകാരമാണ്: ”റമദാനില്‍ ആദ്യഭാഗം (പത്ത്) റഹ്മത്തും മധ്യഭാഗം (നടുവിലെ പത്ത്) പാപമോചനവും അവസാനം (പത്ത്) നരകമോചനവുമാകുന്നു” (ഇബ്‌നു ഖുസൈമ). ഈ ഹദീസിനെക്കുറിച്ച് ഖത്വീബുല്‍ ബഗ്ദാദി രേഖപ്പെടുത്തി: ”ഇതിന്റെ പരമ്പരയില്‍ സലാമുബ്‌നു സുലൈമാന്‍ എന്ന വിശ്വസ്തനല്ലാത്ത ഒരു വ്യക്തിയുണ്ട്” (ദിഹാമുല്‍ ജംഇ വത്തഫ്‌രീഖി 2:147). ഇബ്‌നു അദിയ്യ് ഈ ഹദീസ് രേഖപ്പെടുത്തിയത് ദുര്‍ബല ഹദീസുകളുടെ കൂട്ടത്തിലാണ് (അല്‍കാമില്‍ 4:325). നാസിറുദ്ദീന്‍ അല്‍ബാനി(റ) ഈ ഹദീസിനെക്കുറിച്ച് രേഖപ്പെടുത്തുന്നു: ”ദുര്‍ബലമാണ്” (സില്‍സിലത്തുല്‍ അഹാദിസി ള്ളഈഫത്തി വല്‍ മൗദ്വൂഅത്തി, നമ്പര്‍ 1569).
”നിങ്ങള്‍ നോമ്പനുഷ്ഠിക്കുന്നപക്ഷം രാവിലെ പല്ലുതേക്കുക. വൈകുന്നേരം നിങ്ങള്‍ പല്ലു തേക്കരുത്” (ദാറഖുത്‌നി, ബസ്സാര്‍). നാസിറുദ്ദീന്‍ അല്‍ബാനി പറയുന്നു: ”ഈ ഹദീസ് ദുര്‍ബലമാകുന്നു” (ഇര്‍വാഇല്‍ ഗാലീന്‍, നമ്പര്‍ 67. സില്‍സില നമ്പര്‍ 401). ”ഈ ഹദീസിന്റെ പരമ്പര ദുര്‍ബലമാകുന്നു” (ഇബ്‌നു ഹജര്‍, തല്‍ഖീസ് 1:91).
”നോമ്പുകാരന്റെ ഉറക്കം ഇബാദത്താകുന്നു. അവന്റെ നോമ്പ് തസ്ബീഹാകുന്നു. അവന്റെ കര്‍മങ്ങളുടെ പ്രതിഫലം ഇരട്ടിയാണ്. അവന്റെ പ്രാര്‍ഥന സ്വീകരിക്കപ്പെടും. അവന്റെ പാപങ്ങള്‍ പൊറുക്കപ്പെടും” (ബൈഹഖി, ശഅബുല്‍ ഈമാന്‍). ഈ ഹദീസ് സത്യവും അസത്യവും കൂടിക്കലര്‍ന്നതാണ്. ഹദീസ് ഉദ്ധരിച്ച് ബൈഹഖി തന്നെ ഈ ഹദീസിനെക്കുറിച്ച് രേഖപ്പെടുത്തി: ”ഈ ഹദീസിന്റെ പരമ്പരയില്‍ വിശ്വാസയോഗ്യരല്ലാത്ത മഅ്‌റൂഫുബ്‌നു ഹസനും സുലൈമാനുബ്‌നു അംറുന്നഖ്ഇയുമുണ്ട്. അദ്ദേഹം സുലൈമാനെക്കാള്‍ ദുര്‍ബലനാകുന്നു” (ശഅബുല്‍ ഈമാന്‍ 3:1437).
ഈ ഹദീസിനെക്കുറിച്ച് ജലാലുദ്ദീനുസ്സുയൂത്വി രേഖപ്പെടുത്തി: ”ഈ ഹദീസ് ദുര്‍ബലമാണ്” (ജാമിഉസ്സ്വഗീര്‍, നമ്പര്‍ 9474). ഇമാം ഇറാഖി പ്രസ്താവിച്ചു: ”സുലൈമാനുന്നഖ്ഈ നുണയരില്‍ പെട്ട ഒരുവനാണ്” (തഖ്‌രീജുല്‍ ഇഹ്‌യാഇ 1:310).
ഒരാള്‍ നോമ്പനുഷ്ഠിക്കാന്‍ ഉദ്ദേശിച്ചുകൊണ്ട് അത്താഴം കഴിച്ചാല്‍ അതുതന്നെയാണ് നിയ്യത്ത്. നിയ്യത്ത് എന്നത് മനസ്സിന്റെ തീരുമാനമാണ്, നാവു കൊണ്ട് വിളിച്ചുപറയലല്ല. ഇമാം നവവി(റ) പ്രസ്താവിച്ചു: ”നിയ്യത്ത് എന്നാല്‍ ഉദ്ദേശ്യം എന്നാണ്. അത് മനസ്സിന്റെ തീരുമാനമാണ്” (ഫത്ഹുല്‍ബാരി 1:52). നിയ്യത്ത് വിളിച്ചുപറയല്‍ ബിദ്അത്താണ്. ഇബ്‌നു തൈമിയ്യ(റ) രേഖപ്പെടുത്തി: ”നിയ്യത്ത് ഉച്ചത്തില്‍ വിളിച്ചുപറയല്‍ ദീനില്‍ ചര്യയാണെന്ന് മുസ്‌ലിം പണ്ഡിതരില്‍പെട്ട ഒരാളും തന്നെ പറഞ്ഞിട്ടില്ല. നബി(സ)യോ അവിടത്തെ ഖലീഫമാരോ സഹാബിമാരോ കഴിഞ്ഞുപോയ പണ്ഡിതരോ അപ്രകാരം ചെയ്തിട്ടുമില്ല” (ഫതാവല്‍ കുബ്‌റാ 1:8).
ദുര്‍ബലമായ ഹദീസുകള്‍ കൊണ്ട് തെളിവ് പിടിക്കാന്‍ പാടില്ലെന്ന് ഇമാം ശാഫിഈ(റ) പറയുന്നുണ്ട്: ”ഹദീസ് സ്വഹീഹാണെങ്കില്‍ അതാണ് എന്റെ അഭിപ്രായം” (ബൈഹഖി). ഇമാം നവവി(റ)യും അപ്രകാരം തന്നെയാണ് രേഖപ്പെടുത്തിയത്: ”മതവിധികളില്‍ ദുര്‍ബലമായ ഹദീസുകള്‍ കൊണ്ട് തെളിവാക്കാന്‍ പാടില്ലെന്നതില്‍ തീര്‍ച്ചയായും പണ്ഡിതന്മാര്‍ ഏകോപിച്ചിരിക്കുന്നു” (ശറഹു മുസ്‌ലിം 1:161).
തറാവീഹ് നമസ്‌കാരത്തിന്റെ റക്അത്തുകളെ സംബന്ധിച്ച് ഹൈതമി രേഖപ്പെടുത്തി: ‘നബി(സ) റമദാനില്‍ 20 റക്അത്തും വിത്‌റും നമസ്‌കരിച്ചിരുന്നു എന്ന് ഒരുപാട് പരമ്പരകളിലൂടെ വന്നിട്ടുള്ള ഹദീസുകള്‍ അങ്ങേയറ്റം ദുര്‍ബലങ്ങളാകുന്നു. നബി(സ) റമദാനിലും അല്ലാത്ത കാലത്തും 11 റക്അത്തില്‍ കൂടുതല്‍ നമസ്‌കരിക്കാറുണ്ടായിരുന്നില്ലയെന്ന സ്വഹീഹായ ഹദീസിന് വിരുദ്ധവുമാണ്” (ഫതാവല്‍ കുബ്‌റ 1:194, 195).
ജലാലുദ്ദീനുസ്സുയൂത്വി രേഖപ്പെടുത്തി: ”നബി(സ) തറാവീഹ് നമസ്‌കാരം 20 റക്അത്ത് നമസ്‌കരിച്ചിരുന്നതായി സ്വഹീഹായി സ്ഥിരപ്പെട്ടിട്ടില്ല. അത് സ്ഥിരീകരിച്ചുകൊണ്ട് ചിലര്‍ കൊണ്ടുവന്ന ഹദീസുകള്‍ തെളിവിന് കൊള്ളുന്നതല്ല” (അല്‍ഹാഖീലില്‍ ഫതാവാ 2:172,73).
ഇബ്‌നു ഹജറുല്‍ അസ്ഖലാനി(റ) പറയുന്നു: ”നബി(സ) റമദാനില്‍ 20 റക്അത്തും വിത്‌റും നമസ്‌കരിച്ചിരുന്നു എന്ന് ഇബ്‌നു അബ്ബാസി(റ)ല്‍ നിന്ന് ഇബ്‌നു അബീശൈബ ഉദ്ധരിച്ച ഹദീസിന്റെ പരമ്പര ദുര്‍ബലമാകുന്നു. ആയിശ(റ)യില്‍ നിന്നു ഉദ്ധരിച്ച (11ല്‍ കൂടുതല്‍ അധികരിപ്പിക്കാറുണ്ടായിരുന്നില്ല എന്ന) സഹീഹായ ഹദീസിന് വിരുദ്ധവുമാണത്” (ഫത്ഹുല്‍ബാരി 4:205).
20 റക്അത്തും വിത്‌റും നമസ്‌കരിച്ചതിന് തെളിവാക്കാറുള്ളത് യസീദുബ്‌നു റുമാനില്‍ നിന്ന് ഉദ്ധരിക്കപ്പെടുന്ന ഹദീസാണ്: ”ഉമറി(റ)ന്റെ കാലത്ത് ജനങ്ങള്‍ 23 റക്അത്തുകള്‍ നമസ്‌കരിക്കാറുണ്ടായിരുന്നു.” ഈ ഹദീസിനെക്കുറിച്ച് ഇമാം നവവി(റ) പറയുന്നു: ”യസീദുബ്‌നു റുമാന്‍ ഉമറി(റ)നെ കണ്ടിട്ടില്ല” (ശറഹുല്‍ മുഹദ്ദബ് 4:33).
അപ്പോള്‍ ഈ ഹദീസ് തെളിവിന് കൊള്ളാത്ത (മുന്‍ഖത്വിഅ്) അഥവാ പരമ്പര മുറിഞ്ഞതാണെന്ന് ബോധ്യപ്പെടുന്നു. ഉമര്‍(റ) ജമാഅത്തായി നമസ്‌കരിക്കാന്‍ കല്‍പിച്ചത് 11 റക്അത്തായിരുന്നു. അക്കാര്യം ഇമാം മാലിക്(റ) തന്റെ ‘മുവത്വ’യില്‍ രേഖപ്പെടുത്തിയിട്ടുണ്ട്. ”ഉമര്‍(റ) ഉബയ്യുബ്‌നു കഅ്ബി(റ)നോടും തമീമുദ്ദാരിയോടും ജനങ്ങള്‍ക്ക് നമസ്‌കരിച്ചുകൊടുക്കാന്‍ കല്‍പിച്ചത് 11 റക്അത്തായിരുന്നു” (മുവത്വ 1:115). ജലാലുദ്ദീനുസ്സുയൂത്വി രേഖപ്പെടുത്തി: ”ഇമാം മാലിക് പറഞ്ഞു: ഉമര്‍(റ) സംഘടിപ്പിച്ച ജമാഅത്താണ് ഞാന്‍ ഏറ്റവുമധികം ഇഷ്ടപ്പെടുന്നത്. അത് 11 റക്അത്താണ്. അത് നബി(സ) നമസ്‌കരിച്ചതുമാണ്” (അല്‍ഹാവീലില്‍ ഫതാവാ 2:77).
തറാവീഹുമായി ബന്ധപ്പെട്ട് നടക്കുന്ന മറ്റൊരു ആചാരമാണ് ഈരണ്ടു റക്അത്തുകള്‍ക്കിടയിലെ സ്വലാത്ത്. ഇത് അനാചാരമാണെന്ന് ഫത്‌വ കൊടുക്കുന്നത് ഹൈതമി(റ) തന്നെയാണ്. ”അദ്ദേഹത്തോട് ചോദിക്കപ്പെട്ടു: തറാവീഹ് നമസ്‌കാരത്തിന്റെ ഈരണ്ട് റക്അത്തുകള്‍ക്കിടയില്‍ സ്വലാത്ത് ചൊല്ലല്‍ സുന്നത്താക്കപ്പെടുമോ, അല്ലെങ്കില്‍ അത് തടയപ്പെടേണ്ട ബിദ്അത്താണോ? അദ്ദേഹം മറുപടി നല്‍കി: ഇപ്രകാരം പ്രത്യേകമായി സ്വലാത്ത് ചൊല്ലല്‍ സുന്നത്താണെന്ന് സുന്നത്തില്‍ നാം യാതൊരു രേഖയും കണ്ടിട്ടില്ല. അങ്ങനെ നമ്മുടെ പണ്ഡിതരുടെ പ്രസ്താവനകളിലും വന്നിട്ടില്ല. അത് തടയപ്പെടേണ്ട ബിദ്അത്ത് തന്നെയാണ്” (ഫതാവല്‍ കുബ്‌റ 1:186).
മറ്റൊരു ആചാരമാണ് തറാവീഹ് നമസ്‌കാരത്തില്‍ വിത്‌റിലെ ഖുനൂത്ത്. ഹദീസ് നിദാനശാസ്ത്ര പണ്ഡിതരില്‍ നല്ലൊരു വിഭാഗം വിത്‌റിലെ ഖുനൂത്തിനെ സംബന്ധിക്കുന്ന ഹദീസുകള്‍ ദുര്‍ബലമാണെന്ന് പ്രസ്താവിച്ചിട്ടുണ്ട്. ഇമാം ഇബ്‌നുല്‍ ഖയ്യിം വിത്‌റിലെ ഖുനൂത്തിന്റെ ഹദീസ് ദുര്‍ബലമാണെന്ന് രേഖപ്പെടുത്തിയിട്ടുണ്ട് (സാദുല്‍ മആദ് 1:334). ഇമാം ശൗക്കാനിയും (നൈലുല്‍ ഔത്വാര്‍ 3:50), ഇമാം സ്വല്‍ആനി(റ)യും (സുബുലുസ്സലാം 1:359) അപ്രകാരം പറയുന്നു. ഇബ്‌നു ഹിബ്ബാന്‍ തന്റെ സ്വഹീഹില്‍ പറയുന്നു: ”അത് സ്വഹീഹായി സ്ഥിരപ്പെട്ടതായി ഞാന്‍ അറിഞ്ഞിട്ടില്ല.” (2:153) നവവി(റ) ഇബ്‌നു ഉമറി(റ)ല്‍ നിന്നു റിപ്പോര്‍ട്ട് ചെയ്യുന്നത് ഇപ്രകാരമാണ്: ”വിത്‌റിലെ ഖുനൂത്ത് ബിദ്അത്താണ്. അത് ഇബ്‌നു ഉമറി(റ)ല്‍ നിന്നുമുള്ള റിപ്പോര്‍ട്ടാണ്” (ശറഹുല്‍ മുഹദ്ദബ് 4:24).

0 0 vote
Article Rating
Back to Top
0
Would love your thoughts, please comment.x
()
x