മുസ്‌ലിം വിരുദ്ധ പ്രസംഗം നടത്തുന്നവരുടെ രാഹുല്‍ വേട്ട
അപൂര്‍വാനന്ദ്; വിവ. ഷബീര്‍ രാരങ്ങോത്ത്‌
എന്തൊരു വേഗത! സംസാരിച്ചുതുടങ്ങുന്നതിനും മുമ്പേയുള്ള നടപടി! മോദി സമുദായത്തെ അപകീര്‍ത്തിപ്പെടുത്തിയെന്നാരോപിച്ച് ഗുജറാത്തിലെ സൂറത്ത് കോടതി രാഹുല്‍ ഗാന്ധിയെ രണ്ടു വര്‍ഷം തടവിനു ശിക്ഷിച്ചിരിക്കുന്നു. യഥാര്‍ഥത്തില്‍ ഇത് രാഹുല്‍ ഗാന്ധി ചെയ്ത ഒരു കുറ്റത്തിനുള്ള ശിക്ഷയാണോ?
ലളിത് മോദി, നീരവ് മോദി, പ്രധാനമന്ത്രി നരേന്ദ്ര മോദി തുടങ്ങിയ ഈ കള്ളന്മാര്‍ക്കെല്ലാം ‘മോദി’ എന്ന പദം പൊതുവായി ഉള്ളത് എന്തുകൊണ്ടാണെന്ന് ഒരു തിരഞ്ഞെടുപ്പ് പ്രസംഗത്തിനിടെ അദ്ദേഹം നടത്തിയ പരാമര്‍ശം ‘മോദി’ സമൂഹത്തെ ഒന്നടങ്കം അപകീര്‍ത്തിപ്പെടുത്തുന്നതാണെന്ന് പൊതുസമൂഹം കരുതുന്നുണ്ടോ? ഇത് ഒരു കുറ്റകൃത്യമായി കരുതി കോടതി രാഹുല്‍ ഗാന്ധിക്ക് പരമാവധി ശിക്ഷയായ രണ്ടു വര്‍ഷം തടവു വിധിക്കാന്‍ മാത്രം ഉയര്‍ന്ന മൂല്യബോധം പേറുന്ന സമൂഹമായി നാം വളര്‍ന്നിട്ടുണ്ടോ?
രാഹുല്‍ ഈ തമാശ പറയുമ്പോള്‍ പ്രസംഗത്തിന്റെ പരിധി ലംഘിച്ചുവെന്ന് വിശുദ്ധമായി പ്രസംഗിക്കുന്നവര്‍ മുസ്‌ലിംകളെ ഉന്മൂലനം ചെയ്യണമെന്നും വോട്ടിങിലൂടെ അവരെ പാഠം പഠിപ്പിക്കണമെന്നും പരസ്യമായി ആഹ്വാനം ചെയ്യുന്നവരാണ്.
രാഹുല്‍ ഗാന്ധിയുടെ പ്രസംഗത്തിന് ഈ ശിക്ഷ ആവശ്യപ്പെട്ടാല്‍ ബി ജെ പിയുടെ ഉന്നത നേതാക്കള്‍ നിരവധി ജീവനുകള്‍ക്കായി ജയിലില്‍ കിടക്കേണ്ടിവരും. പക്ഷേ അതുണ്ടാകുന്നില്ല. നമ്മുടെ കോടതികള്‍ക്ക് രണ്ട് സെറ്റ് മാനദണ്ഡങ്ങളുണ്ട്: ഒന്ന് രാഹുല്‍ ഗാന്ധിക്കും ഉമര്‍ ഖാലിദിനും. മറ്റൊന്ന് ‘രാജ്യദ്രോഹി'(?)കളെ വെടിവയ്ക്കാന്‍ പരസ്യമായി ആഹ്വാനം ചെയ്യുന്ന ബി ജെ പി നേതാക്കള്‍ക്കും.
ഹിന്ദുത്വ നിഘണ്ടുവിലെ ‘രാജ്യദ്രോഹി’ എന്ന വാക്ക് മുസ്‌ലിംകള്‍ക്കും ഭരണകൂടത്തിന്റെ എതിരാളികള്‍ക്കും മാത്രമായി നീക്കിവച്ചിരിക്കുന്നു. വെടിവയ്ക്കാനുള്ള ആഹ്വാനം യഥാര്‍ഥത്തില്‍ ഒരു തമാശയാണെന്ന് കോടതികള്‍ കരുതുന്നു. അവര്‍ നിങ്ങളെ അധിക്ഷേപിക്കുമ്പോള്‍, പുഞ്ചിരിയോടെ ഭീഷണിപ്പെടുത്തുമ്പോള്‍, അത് നിങ്ങളെ വേദനിപ്പിക്കരുത്- ഇതാണ് കോടതികള്‍ പറയുന്നത്.
എന്നാല്‍, രാഹുല്‍ ഗാന്ധി മാതൃകയായിരിക്കണം! അദ്ദേഹത്തിനെന്താ തമാശ പറഞ്ഞുകൂടേ? അധിക്ഷേപകരമായ ഭാഷ ഹിന്ദുത്വ രാഷ്ട്രീയക്കാര്‍ക്ക് മാത്രം സംവരണം ചെയ്യപ്പെട്ടതും രാഹുല്‍ ഗാന്ധിയെപ്പോലുള്ള സാംസ്‌കാരികമായി ഉന്നതരായ ആളുകള്‍ക്ക് വിവേകശൂന്യമായ സംസാരം പാടില്ലെന്നുമാണോ? അവരുടെ മാത്രം ഉത്തരവാദിത്തമാണോ പൊതുസ്ഥലങ്ങളില്‍ മാന്യത കാത്തുസൂക്ഷിക്കേണ്ടത്?
അത് അങ്ങനെയല്ല. എല്ലാം കഴിയാവുന്നിടത്തോളം സുതാര്യമാണ്. രണ്ടു വര്‍ഷത്തെ ജയില്‍ശിക്ഷ വഴി മാത്രമേ രാഹുല്‍ ഗാന്ധിയെ നിയമപരമായി പുറത്താക്കാന്‍ ലോക്‌സഭാ അധികാരികള്‍ക്ക് കഴിയൂ. രാഹുല്‍ ഗാന്ധിയുടെ സാന്നിധ്യം സര്‍ക്കാരിന് കഴുത്തിലെ വേദനയായി മാറുകയായിരുന്നു. ലണ്ടനില്‍ നടത്തിയ പ്രസംഗങ്ങളുടെ പേരില്‍ സര്‍ക്കാര്‍ ഉണ്ടാക്കിയ വിവാദത്തില്‍ തന്റെ പക്ഷം അവതരിപ്പിക്കാനുള്ള അവസരം അദ്ദേഹത്തിന് ഇതുവരെ ലഭിച്ചിട്ടില്ല. അദ്ദേഹം സര്‍ക്കാരിനെ വിമര്‍ശിക്കുകയും തന്റെ രാജ്യത്തെ ജനാധിപത്യത്തിന്റെ ആരോഗ്യത്തെക്കുറിച്ച് യാഥാര്‍ഥ്യബോധത്തോടെ നിരാശ പ്രകടിപ്പിക്കുകയും ചെയ്തു.
ഇന്ത്യന്‍ ജനാധിപത്യം ലോകത്തിന് പൊതുനന്മയാണെന്നും അതിന്റെ നിര്യാണം ലോകത്തെ പ്രതികൂലമായി ബാധിക്കുമെന്നും അദ്ദേഹം പറഞ്ഞു. എന്നാല്‍ പ്രശ്‌നം പുറത്തുനിന്ന് വരാത്തതിനാല്‍ ഉത്തരം ഉള്ളില്‍ നിന്ന് വരണമെന്ന് അദ്ദേഹം അറിഞ്ഞു. ഇത് ഞങ്ങളുടെ പ്രശ്‌നമാണെന്ന് അദ്ദേഹം വ്യക്തമായി പറഞ്ഞു. ഞങ്ങള്‍ സ്വയം ഒരു പരിഹാരം കണ്ടെത്തണം. മാധ്യമങ്ങളിലൂടെ സര്‍ക്കാരും ബി ജെ പിയും ഈ പരാമര്‍ശത്തെ തെറ്റിദ്ധരിപ്പിക്കാനും ഇന്ത്യാവിരുദ്ധ അധിക്ഷേപമാക്കി മാറ്റാനും ശ്രമിച്ചു.
സര്‍ക്കാര്‍ അംഗങ്ങള്‍ തനിക്കെതിരെ സഭയില്‍ ആരോപണങ്ങള്‍ ഉന്നയിച്ചതിനാല്‍ വ്യക്തത വരുത്താന്‍ അനുവദിക്കുന്നത് ന്യായമാണെന്ന് രാഹുല്‍ ഗാന്ധി ആവശ്യപ്പെട്ടു. എന്നാല്‍ അനുവദിക്കുന്നതിനു മുമ്പ് മാപ്പ് പറയണമെന്ന് ബി ജെ പി ആവശ്യപ്പെട്ടു. അദ്ദേഹത്തിന് സംസാരിക്കാന്‍ അവസരം നിഷേധിക്കാന്‍ ഭരണകൂട ബെഞ്ചുകള്‍ സഭയെ തടസ്സപ്പെടുത്തിക്കൊണ്ടിരുന്നു. എന്നാല്‍ അത് എന്നെന്നേക്കുമായി നിലനില്‍ക്കില്ല. ഒരു ഘട്ടത്തില്‍ അദ്ദേഹത്തിന് സംസാരിക്കാന്‍ നിലം നല്‍കേണ്ടിവരും.
അങ്ങനെ വരുമ്പോള്‍ നിയമപരമായ മറ്റൊരു മാര്‍ഗം ഉപയോഗിച്ച് അദ്ദേഹത്തെ പുറത്താക്കുന്നതിനേക്കാള്‍ നല്ലത് മറ്റെന്താണ്? അതാണിപ്പോള്‍ ചെയ്തിരിക്കുന്നത്. ഉത്തരവിന് പിന്നിലെ യുക്തി മനസ്സിലാക്കാന്‍ നിയമവിദഗ്ധര്‍ ശ്രമിക്കുന്നു. മാനനഷ്ട നിയമം പ്രയോഗിക്കാവുന്ന ഒന്നും ഇതിലില്ലെന്ന് അവര്‍ ചൂണ്ടിക്കാണിക്കുന്നുണ്ട്. പരമാവധി ശിക്ഷയുടെ കാര്യം അതിലും വിചിത്രമാണ്. അദ്ദേഹത്തിന്റെ അംഗത്വം നിഷേധിക്കാന്‍ ലോക്‌സഭാ സെക്രേട്ടറിയറ്റ് നീങ്ങിയ വേഗത പൊതുജനത്തിന്റെ കിളി പോകാന്‍ പോന്നതാണ്.
മോദിയുടെ നേതൃത്വത്തിലുള്ള ഭൂരിപക്ഷ സര്‍ക്കാരിന്റെ അനീതി നിലനിര്‍ത്താന്‍ എല്ലാ മാര്‍ഗങ്ങളും ഉപയോഗിക്കുമെന്ന് എല്ലാവരോടും പറയാനാണ് ഇതെല്ലാം. കൃത്യമായ ധര്‍മബോധത്തോടെ രാഹുല്‍ ഗാന്ധി അദ്ദേഹത്തെ വെല്ലുവിളിക്കുന്നതിനാല്‍ തന്നെ, അദ്ദേഹം അതിന് വില നല്‍കേണ്ടിയും വരും. എന്നാല്‍ യഥാര്‍ഥത്തില്‍ ദുരിതമനുഭവിക്കുന്നത് ആരാണ്? രാഹുല്‍ ഗാന്ധിയോ അതോ ജനങ്ങളോ?