നജീബ് എവിടെ എന്ന ചോദ്യം അവസാനിക്കുന്നില്ല
അബ്ദുല്‍ മനാഫ്‌
ഹിന്ദുത്വ പ്രവണതകള്‍ക്കെതിരെ വലിയ പ്രക്ഷോഭങ്ങള്‍ നയിച്ചവരാണ് രാജ്യത്തെ കാമ്പസുകള്‍. ജെ എന്‍ യു വും എച്ച് സി യുവും ജാമിഅയുമെല്ലാം അക്കൂട്ടത്തില്‍ നേതൃപരമായ പങ്കുവഹിച്ചവരാണ്. ജെ എന്‍ യുവില്‍ 2016 ല്‍ നടന്ന കലഹം മറക്കാനിടയില്ല. എ ബി വി പിയുമായുള്ള സംഘര്‍ഷത്തെ തുടര്‍ന്ന് അന്ന് അവിടെ ഒരു വിദ്യാര്‍ഥിയെ കാണാതെയാവുകയുണ്ടായി. പേര് മുഹമ്മദ് നജീബ്. എട്ടു വര്‍ഷം പിന്നിട്ടിട്ടും നജീബിനെക്കുറിച്ച് യാതൊരു വിവരവുമില്ല. നജീബിന്റെ കേസ് രാജ്യത്തെ ഉന്നത ഏജന്‍സികള്‍ അന്വേഷിച്ചുവെങ്കിലും കാര്യമുണ്ടായില്ല. വിദ്യാര്‍ത്ഥിയുടെ തിരോധാനത്തിന് ഉത്തരവാദികളായവരുമായി അധികാരികള്‍ക്ക് പങ്കുണ്ടെന്ന് അദ്ദേഹത്തിന്റെ കുടുംബം വിശ്വസിക്കുന്നു. ജെ എന്‍ യുവില്‍ ബിരുദാനന്തര ബിരുദം നേടാനെത്തിയ 31-കാരനായ ബയോടെക്നോളജി വിദ്യാര്‍ത്ഥിയുടെ തിരോധാനത്തെക്കുറിച്ച് ഇന്നും ആര്‍ക്കും ഒന്നും അറിയില്ല. ഒന്നാംവര്‍ഷ എം എസ് സി ബയോടെക്നോളജി വിദ്യാര്‍ത്ഥിയായ അഹമ്മദിനെ 2016 ഒക്ടോബര്‍ 15-ന് തന്റെ ഹോസ്റ്റല്‍ മുറിയില്‍ നിന്നാണ് കാണാതായത്. ആര്‍ എസ് എസിന്റെയും എ ബി വി പി വിദ്യാര്‍ത്ഥികളുമായുള്ള വഴക്കിനെ തുടര്‍ന്നാണ് നജീബിനെ കാണാതാകുന്നത്. തെരഞ്ഞെടുപ്പ് പ്രചാരണ പരിപാടിയുടെ ഭാഗമായെത്തിയ വിക്രാന്ത് കുമാര്‍, അങ്കിത് കുമാര്‍, സുനില്‍ പ്രതാപ് എന്നീ വിദ്യാര്‍ത്ഥികളും അഹമ്മദുമായി വാക്കേറ്റമുണ്ടാവുകയായിരുന്നു. തര്‍ക്കത്തിന്റെ കാരണം എന്താണെന്ന് വ്യക്തമല്ല.
എ ബി വി പി അംഗങ്ങള്‍ അഹമ്മദിനെ അതിക്രൂരമായി മര്‍ദിച്ചു. വാര്‍ഡന്‍ ഉള്‍പ്പെടെ എല്ലാവരുടെയും മുന്നില്‍ വെച്ച് നജീബിനെ മര്‍ദിച്ച അക്രമികളില്‍ നിന്ന് രേഖാമൂലമുള്ള വിശദീകരണമൊന്നും എടുത്തിട്ടില്ല എന്നതും നജീബില്‍ നിന്ന് അത് എഴുതി വാങ്ങി എന്നതും ദുരൂഹത വര്‍ധിപ്പിക്കുന്നു. നജീബിന്റെ കേസില്‍ പൊലീസ് എഫ് ഐ ആര്‍ രജിസ്റ്റര്‍ ചെയ്തത് 2016 ഒക്ടോബര്‍ 15-നായിരുന്നു. അദ്ദേഹത്തിന്റെ തിരോധാനത്തിന് പിന്നില്‍ പൊലീസ് ഒമ്പത് പേരെ പ്രതികളാക്കി. പൊലീസ് അന്വേഷണത്തില്‍ കാര്യമായ പുരോഗതിയുണ്ടായില്ല. അന്വേഷണത്തില്‍ അതൃപ്തി പ്രകടിപ്പിച്ച നജീബിന്റെ കുടുംബം അടുത്ത മാസം ഡല്‍ഹി ഹൈക്കോടതിയെ സമീപിച്ചു. 2017 മെയ് മാസത്തില്‍ കോടതി കേസ് സി ബി ഐക്ക് കൈമാറി. എന്നാല്‍ സി ബി ഐ സംശയിക്കുന്നവരെ ചോദ്യം ചെയ്യേണ്ട രീതിയിലല്ല ചോദ്യം ചെയ്തതെന്നും അന്വേഷണം നടത്തിയതെന്നും കുടുംബം ആരോപിച്ചു.
നജീബിനെതിരെ കുറ്റകൃത്യം നടന്നിട്ടുണ്ടെന്ന് തെളിയിക്കുന്ന തെളിവുകളൊന്നും ലഭിച്ചില്ലെന്ന് 2018 മെയില്‍ സി.ബി.ഐ പറഞ്ഞു. അതേ വര്‍ഷം ഒക്ടോബറില്‍, അന്വേഷണ ഏജന്‍സി ഡല്‍ഹി ഹൈക്കോടതിയില്‍ ഒരു ക്ലോഷര്‍ റിപ്പോര്‍ട്ട് സമര്‍പ്പിച്ചു, പിന്നാലെ കേസ് അവസാനിപ്പിച്ചു. പൊലീസ് ജെ എന്‍ യു കാമ്പസിനെ 11 സോണുകളായി തിരിച്ച് 560-ലധികം പൊലീസുകാരെ പല ടീമുകളായി തിരിച്ച് സമഗ്രമായ തിരച്ചില്‍ നടത്തി. തുടര്‍ന്ന്, മൂന്ന് വ്യത്യസ്ത അന്വേഷണ ഏജന്‍സികള്‍ ഡല്‍ഹി പൊലീസ്, അതിന്റെ ക്രൈംബ്രാഞ്ച്, സി ബി ഐ എന്നിവര്‍ രാജ്യത്തുടനീളം നിരവധി തിരച്ചില്‍ പ്രവര്‍ത്തനങ്ങള്‍ നടത്തിയെങ്കിലും നാളിതുവരെ അവനെക്കുറിച്ച് ഒരു തുമ്പും ലഭിച്ചിട്ടില്ല. ഒരു തുമ്പും ലഭിക്കാത്ത കേസ് എന്തുകൊണ്ട് ഇത്ര പെട്ടെന്ന് സി ബി ഐ അവസാനിപ്പിച്ചു എന്നത് ചോദ്യം ചെയ്യപ്പെടേണ്ടതാണ്. നമ്മുടെ ഓര്‍മകളില്‍ നിന്ന് നജീബും രോഹിത് വെമുലയുമൊന്നും മറക്കാതെ നോക്കേണ്ടതുണ്ട്. അവരൊക്കെയും ഹിന്ദുത്വയുടെ ക്രൂരതകളുടെ പ്രതീകങ്ങളാണ്.