അന്ധവിശ്വാസത്തിലേക്കുള്ള തിരിച്ചുപോക്ക് ഗൗരവമായി കാണണം
കണ്ണൂര്‍: കണ്ണേറ്, കൂടോത്രം, പ്രേതബാധ, ജിന്ന് ബാധ തുടങ്ങിയ അന്ധവിശ്വാസങ്ങളില്‍ നിന്ന് മോചനം നേടി നിര്‍ഭയത്വ ജീവിതം നയിക്കാനാണ് വേദപ്രമാണങ്ങള്‍ ആഹ്വാനം ചെയ്യുന്നതെന്ന് കെ എന്‍ എം മര്‍കസുദ്ദഅ്‌വ ആദര്‍ശ സംവാദം അഭിപ്രായപ്പെട്ടു. ഇത് ഉള്‍ക്കൊള്ളാതെ കുറുന്തോട്ടിക്ക് വാതം പിടിച്ച പോലെ മത പ്രമാണങ്ങളെ ദുര്‍വ്യാഖ്യാനിച്ച് അന്ധവിശ്വാസം പ്രചരിപ്പിക്കാന്‍ ചില മത സംഘടനകളും പൗരോഹിത്യ സംഘങ്ങളും പ്രവര്‍ത്തിക്കുന്നത് മതസമൂഹവും പൊതുസമൂഹവും ഗൗരവമായികാണണമെന്നും ആദര്‍ശ സംവാദം മുന്നറിയിപ്പ് നല്‍കി. സംസ്ഥാന ട്രഷറര്‍ എം അഹമ്മദ്കുട്ടി മദനി ഉദ്ഘാടനം ചെയതു.
ജില്ലാ പ്രസിഡന്റ് സി സി ശക്കീര്‍ ഫാറൂഖി അധ്യക്ഷത വഹിച്ചു. സംസ്ഥാന വൈസ് പ്രസിഡന്റ് ശംസുദ്ദീന്‍ പാലക്കോട്, സെക്രട്ടറി അബ്ദുല്ലത്തീഫ് കരുമ്പുലാക്കല്‍, നിര്‍വാഹക സമിതിയംഗം അലി മദനി മൊറയൂര്‍, സയ്യിദ് സുല്ലമി, അബ്ദുല്‍കലാം ഒറ്റത്താണി, ഫൈസല്‍ ചക്കരക്കല്ല് പ്രഭാഷണം നടത്തി. ‘കാലം തേടുന്ന ഇസ്‌ലാഹ്’ പുസ്തക പ്രകാശനം പി അഷ്‌റഫ് ഹാജിക്ക് അലി മദനി മൊറയൂര്‍ നല്‍കി നിര്‍വ്വഹിച്ചു. വെളിച്ചം പുസ്തക പ്രകാശനം ശംസുദ്ദീന്‍ പാലക്കോട് കെ പി ഉമ്മര്‍ മാട്ടൂലിന് നല്‍കി നിര്‍വഹിച്ചു.
ഡിപ്ലോമാറ്റ് ദേശീയ പരീക്ഷാ ബോര്‍ഡിന്റെ ഫാമിലി മെഡിസിന്‍ പരീക്ഷയില്‍ ഒന്നാംറാങ്കും രാഷ്ട്രപതിയുടെ സ്വര്‍ണ മെഡലും നേടിയ ഡോ. റോഷ്‌ന അബ്ദുശ്ശുക്കൂര്‍, മണിപ്പൂര്‍ വനം പരിസ്ഥിതി മന്ത്രാലയത്തിന്റെ പ്രശ്‌നോത്തരി മത്സരത്തില്‍ ഒന്നാം സ്ഥാനം നേടിയ അബ്ദുല്‍ ബാസിത്ത്, എം.എ അറബിക്കില്‍ ഒന്നാം റാങ്ക് നേടിയ എം പി ഹിബ, വിശിഷ്ട സേവനത്തിന്ന് മുഖ്യമന്ത്രിയുടെ പോലീസ് മെഡല്‍ നേടിയ കണ്ണൂര്‍ ടൗണ്‍ എസ് ഐ ജിയാസ്, എം എസ് എം സംസ്ഥാന പ്രസിഡന്റായി തിരഞ്ഞെടുക്കപ്പെട്ട ജസിന്‍ നജീബ് എന്നിവരെ ആദരിച്ചു.
കെ എന്‍ എം മര്‍കസുദ്ദഅ്‌വ ജില്ലാ സെക്രട്ടറി ഡോ. അബ്ദുല്‍ജലീല്‍, ഐ എസ് എം ജില്ലാ സെക്രട്ടറി സഹദ് ഇരിക്കൂര്‍, എം ജി എം ജില്ലാ സെക്രട്ടറി കെ പി ഹസീന, എം എസ് എം ജില്ലാ പ്രസിഡന്റ് അബ്ദുല്‍ബാസിത്ത്, ഐ ജി എം ജില്ലാ സെക്രട്ടറി ഷാന ഏഴാം, പി വി അബ്ദുസ്സത്താര്‍ ഫാറൂഖി പ്രസംഗിച്ചു.